Suksesverhale

Geraldine Dold

Ek kom van Pretoria. My ma en biologiese pa is geskei toe ek nog baie klein was en my biologiese pa het kort daarna selfmoord gepleeg. My ma het my alleen grootgemaak tot sy my stiefpa ontmoet het, ’n liewe mens wat ek “Pappa” noem en wat in elke sin van die woord my pa is.
Ek het aansoek gedoen vir ‘n ROF leningsbeurs omdat my ma nooit finansieel kon voorsiening maak vir my studies nie aangesien sy vir so lank ‘n enkelouer was. Ek het geweet ek wou bitter graag gaan studeer om my roeping te vervul en ek moes pro-aktief raak en soek vir geleenthede. Gelukkig het ek gehoor van ROF!
My ma, pa, boetie en ouma is van die heel belangrikste mense in my lewe. Ons is ‘n baie hegte gesin en hulle ondersteun my 100%. Hulle woon al die skoolfunksies by waarvan ek deel is en hulle is werklik sterre.
Ek gee tans onderwys by Hoërskool Tuine waar ek Lewenswetenskappe en Fisiese Wetenskap gee aan Gr.10- en 12-leerders.

Kristoff Isaacs

Na 25 jaar in die onderwys, was Kristoff Isaacs se pa glad nie baie verbaas toe sy jongste seun in sy voetspore wou volg deur ook ‘n onderwyser te word nie. As jong seun het Kristoff elke Sondag Rapport afgelewer en as student kon hy sy hegte verhouding met Rapport voortsit nadat hy ’n ROF-leningsbeurs ontvang het.
“Ek geen al tien jaar lank skool by Chatsworth Primêre Skool, `n landelike skool net buite Malmesbury. Daar is elke dag nuwe uitdagings – `n oorvol klas, te min apparaat, slange op die skool perseel en `n sanderige sportveld en nog baie meer.
“Dit is die tipe uitdagings wat jou inspireer en laat lag, maar sommige dae ook frustreer en selfs laat huil. Soms probeer jy die wêreld verander en sommige dae sukkel jy net om deur die dag te kom. Maar alles is die moeite werd as jy die leerders iets nuut leer en `n glimlag op hul gesigte sien.
“Tans gee ek Wiskunde en Natuurwetenskappe aan kinders van gr.5 tot gr.7. My klasse is deurgaans groter as 50 leerders. Ek is ook verantwoordelik vir die skool se biblioteek en is die sportkoördineerder waar ek rugby, atletiek, skaak en ’n baie suksesvolle sokkerspan afrig.”

Lanette Nel

“Ek het in Vereeniging grootgeword saam met twee ouer broers, ‘n ouer sussie en ‘n pa en ma wat die vier van ons sonder perke liefgehad het. My sussie het onderwys geswot; ek vermoed dit is waar die onderwysgogga my gebyt het. Ek wou graag haar voorbeeld volg.
Die leningsbeurs het ‘n groot invloed op my suksesse gehad. Vroeg in my derde jaar is my pa skielik oorlede. Ek weet nie hoe om die impak daarvan op my lewe te beskryf nie. Daar was natuurlik tye tydens daardie jaar wat ek wou tou opgooi, maar my pa se voorbeeld van nooit opgee nie het my deurgetrek. Uiteindelik was my derde jaar ook my beste akademiese jaar.
ROF was verder baie goed vir my en het ook my twee jaar van honneurs in Onderwysreg help betaal.
“Vir die afgelope sewe jaar gee ek Afrikaans vir Gr.10 en 11 by Hoërskool Dr. Malan in Meyerton. Die lekkerste van alles is dat ek en my sussie nou kollegas is.
“My leerders voel soms soos my eie kinders. As hulle vir ‘n oomblik kan lag, gelukkig en veilig voel, dan is my dagtaak bereik. Hulle neem ‘n mens se hart oor. Die onderwys is nie maklik nie, die druk van presteer en ekstra werkslading raak soms net te veel. Soms is die enigste rede vir opstaan in die oggend, ‘my kinders’ wat vir my wag. Ek is oortuig dat ‘n mens nie in die onderwys kan wees as jou hart nie omgee-klop vir kinders nie.”

Jevonne Cloete

“Ek is ‘n Namakwalander uit Rooifontein, ‘n klein dorpie net buite Springbok, in die Noord-Kaap. Ek is die eerste uit my familie om universiteit toe te gaan. Ek sou nooit kon dink dat ek ‘n graduandus aan die Universiteit Stellenbosch sou wees nie. ‘n Droom om meer te doen as die buurman en buurvrou sonder geleerdheid waarvandaan ek kom, was in sig…”
Jevonn het uiteindelik sy B.Ed (Wiskunde) en B.Ed Hon cum laude geslaag. Hy wen ‘n ROF Prestige-toekenning wat hom vir ‘n somerskool na Utrecht in Nederland stuur. Hy is tans besig met sy M.Ed en is ‘n onderwyser by ‘n leergestremde Skool.
“Toe die gogga van Spesiale Onderwys my byt, het ROF se leningsbeurs vir my geleentheid gebied om myself in hierdie spesialisveld te bemagtig. Nie net het hierdie leningsbeurs ‘n groot droom verwesenlik nie, maar dit het die skynlik onwerklike nader na my beroepsvoorstoep gebring.
Vandag staan ek as leerondersteuningspesialis in ‘n klas vol spesiale leerders met intellektuele gestremdhede met ‘n hart vol tevredenheid en salige gemoedsrus vir die verskil wat ek kan maak. Dankie ROF- my beker loop oor!”